ទំនាយជោគជាតារាសីតាមឆ្នាំកំណើតបុរាណខ្មែរ

ទំនាយឆ្នាំកំណើត សំរាប់ឆ្នាំជូត

ឆ្នាំជូត (កណ្ដុរ) ពង្សទេវតាប្រុស ត្រូវកាលនាយសារថី នាំយកព្រះតេមិយ ជាមនុស្ស គ ទៅកប់ ។

ឆ្នាំជូត កាលនៅពីតូច អភ័ព្វ ពំនាក់អាស្រ័យនឹងញាតិកា មិនបាន បើអ្នកដទៃទើបពឹងបាន ដល់មកគ្រាក្រោយ នឹងមានបុណ្យវាសនា ធ្វើរាជការ យកអាសាចៅហ្វាយនាយ នឹងបានជា ឃុននាងចូលចិត្ត ជេរកូនប្រពន្ធ និងបរិភោគវត្ថុណាដែល ជាសត្រូវដល់ខ្លួនស្រឡាញ់តែទ្រព្យសម្បត្តិរបស់ខ្លួន ស្រឡាញ់រាប់អានសមណព្រាហ្មណ៍ ដាក់ទានដល់មនុស្សទីទ័លក្រ ។ បើ ស្ត្រីវិញ នឹងបានកូន ២ នាក់ ជាទីពឹង ពំនាក់អាស្រ័យ ។ អាយុបាន ១ ឆ្នាំ បីបាច់ថែរក្សាលំបាកណាស់ ព្រោះមានរោគច្រើន ។ អាយុបាន ១៥ ឆ្នាំ ត្រូវចេញពីលំនៅ ទៅនៅទីដទៃ ទើបមានលាភ ។

អាយុ ១១ _១២ _១៣ នឹងមានគ្រោះកាចម្ដង ប្រស្រ័យនឹងអ្នកធំបានល្អ ។ ព្រះអង្គា ជាចិត្ត ចិត្តនោះច្រើនតែឃ្លេង ឃ្លោងមិននឹងធឹង ចូលចិត្តរៀនចំណេះវិជ្ជា ការចេះដឹង មធ្យមល្មមចិញ្ចឹមខ្លួនបាន ។ ព្រះព្រហស្បត្តិ ជាអាសន៍ មានតណ្ហានឹងរាគ ច្រើន ។ ព្រះចន្ទ្រនិងព្រះពុធជាដៃ ធ្វើការងារច្រើនតែមិនសំរេចប្រយោជន៍ តែមានសេចក្ដីឧស្សាហ៍ ។ ព្រះសុខនិងព្រះសៅរ៍ ជាជើងច្រើនតែជាមនុស្ស ចូល ចិត្តដើរ ។

ឆ្នាំជូត អ្នកមានកំណើតក្នុងខែ

– ៥ / ៦ / ៧ ៈ កណ្ដុរមាស សម្បុរសសុទ្ធ ធាតុទឹកក្នុងទន្លេ ជាសត្វកណ្ដុរពាំកែវ មានបុណ្យវាសនា ។
– ៨ / ៩ / ១០ ៈ កណ្ដុរតូចៗ ធាតុទឹក ដែលមនុស្សអាស្រ័យ ចរចាមិនពិត តែចិត្តបុណ្យ ។
– ១១ / ១២ / ១ ៈ កណ្ដុរខ្មោច ធាតុទឹកក្នុងព្រៃ រកស៊ីចិញ្ចឹមជីវិតលំបាកចិត្តខ្លាំង ។
– ២ / ៣ / ៤ ៈ កណ្ដុរនៅតាមវាលស្រែ ធាតុទឹកស្ទឹង ជាកណ្ដុរភ្នែកធំ នឹងមានកូនច្រើន តែចិត្តបុណ្យ ។

ឆ្នាំជូត អ្នកមានកំណើតក្នុងថ្ងៃ

ថ្ងៃអាទិត្យ ៈ កាលព្រះសត្តលុង ត្រូវគេចាប់យកទៅសំលាប់ នឹងមានទុក្ខច្រើន តែរូបស្អាត ។
ថ្ងៃច័ន្ទ ៈ នឹងមានសេចក្ដីសុខសប្បាយជានិច្ច ល្អណាស់ ។
ថ្ងៃអង្គារ ៈ កាលព្រះបាទចក្រពត្តិ អោយចាប់យកព្រះសត្តលុងទៅសំលាប់ នឹងលំបាកជានិច្ច ។
ថ្ងៃពុធ ៈ នឹងជាមនុស្សទុក្ខរឿយៗ អភ័ព្វមិនល្អឡើយ ។
​ថ្ងៃ​ព្រហស្បតិ៍​ ៈ កាលទេវតាប្រោះព្រះសត្តលុងអោយរស់ឡើងវិញល្អណាស់ ។
ថ្ងៃសុក្រ ៈ កាលទេវតារៀបចំភោជនាហារ មកថ្វាយព្រះសត្តលុង ល្អណាស់ ។
ថ្ងៃសៅរ៍ ៈ កាលព្រះសត្តលុងបានសោយរាជ្យសម្បត្តិល្អណាស់ហោង ។

ទំនាយឆ្នាំកំណើត សំរាប់ឆ្នាំឆ្លូវ

ឆ្នាំឆ្លូវ (គោ) ពង្សមនុស្សប្រុស ត្រូវកាលព្រះមហាជនកលាមាតាទៅរកអាចារ្យ សំពៅបែកធ្លាយកណ្ដាលសមុទ្រ បាននាងមេខលា នាំយកទៅទុកក្នុងឧទ្យាន ។

ឆ្នាំឆ្លូវ បើធ្វើជំនួញ នឹងមានលាភច្រើន មានកូន ៤ នាក់ បានកូនម្នាក់ជាទីពំនាក់អាស្រ័យ ម្នាក់ទៀតចូលចិត្តធ្វើការ រាជការ ។

បើកើតថ្ងៃច័ន្ទ ជាមាត់ មាត់នោះឆុតណាស់និយាយស្ដីស្រស់ស្រាយរៀនសូត្រវិជ្ជាបានល្អ ចរចាមិនចាញ់ប្រៀបគេទេ ព្រះពុធជាចិត្ត ចិត្តនោះត្រូវការតែពាក្យណាដែលមានប្រយោជន៍ចូល ចិត្ត សេពគប់ព្រះសង្ឃ និងចៅហ្វាយនាយ នាម៉ឺន មុខមន្ត្រី ។ ព្រះសៅរ៍ជាអាសន៍ មានកាមរាគខ្លាំង បើមនុស្សប្រុស នឹងមានប្រពន្ធច្រើន បើស្រីនឹងមានស្នាមក្នុងទីកំបាំង ។ ព្រះអាទិត្យនិងព្រហស្បតិជាដៃ ធ្វើការមិនសូវខូចខាត ។ ព្រះអង្គារ និង ព្រះសុក្រ ជាជើង មិនត្រូវការដើរ ។

ឆ្នាំឆ្លូវ អ្នកមានកំណើតក្នុងខែ

– ៥ / ៦ / ៧ ៈ គោព្រៃ ធាតុដីឆ្អិន ជាគោឡើង កាត់ពូជច្រើន ចិត្តអាក្រក់ លំបាកប្រើ ចិត្តរឹង កាលនៅពីតូចល្អ ។
– ៨ / ៩ / ១០ ៈ គោស្រុក ធាតុដីស្ងោរ ចរចារមិនពិត មិនប្រាកដ មានចិត្តក្លាហាន ។
– ១១ / ១២ / ១ ៈ គោស្គាំងស្គម ធាតុដីភ្នំ ជាគោនៅក្នុងរោង រកស៊ីលំបាកលំបិន តែមានចិត្តបុណ្យ ។
– ២ / ៣ / ៤ ៈ គោឩសភរាជ ធាតុដីលាបជង្រុគ ឩត្តមល្អ និង​ មានទ្រព្យច្រើន ។

ឆ្នាំឆ្លូវ អ្នកមានកំណើតក្នុងថ្ងៃ

ថ្ងៃអាទិត្យ ៈ គោចិត្តអាក្រក់ អភ័ព្វ មិនល្អ ។
ថ្ងៃច័ន្ទ ៈ គោពោធិសត្វ មានបរិវាច្រើន ល្អណាស់ ។
ថ្ងៃអង្គារ ៈ គោសាធារណ៍ អភ័ព្វ មិនល្អ ។
ថ្ងៃពុធ ៈ គោបាក់ជើង ខ្វាក់ភ្នែកផង រកស៊ី ចិញ្ចឹមជីវិតបានដោយលំបាក ។
ថ្ងៃព្រហស្បតិ ៈ គោចិត្តល្អ មានទ្រព្យសម្បត្តិច្រើន ។
ថ្ងៃសុក្រ ៈ គោនាយពាណិជ ត្រូវធ្វើការនឿយហត់ជានិច្ច ។
ថ្ងៃសៅរ៍ ៈ គោចោរលួចយកទៅសំលាប់ នឹងត្រូវទទួលសេចក្ដីលំបាកជានិច្ច ។

ទំនាយឆ្នាំកំណើត សំរាប់ឆ្នាំខាល

ឆ្នាំខាល (ខ្លា) ពង្សយក្ខិនី ត្រូវកាលព្រះសុវណ្ណសាមទៅដងទឹក ជាមួយពួកសត្វ ។

ឆ្នាំខាល ជាអ្នកមានបុណ្យវាសនា កាលនៅពីតូច អភ័ព្វមាតាបិតា និងប្រាសចាកញាតិកា ពឹងបងប្អូន និងញាតិមិនបាន បើពឹងអ្នកដទៃទើបបានល្អ ជាមនុស្សអភ័ព្វ ធ្វើគុណដល់អ្នក ដទៃមិនបានផលប្រយោជន៍ទេ អាយុបាន ២ ឆ្នាំ មានគ្រោះអាក្រក់ម្ដង , អាយុ ២០ឆ្នាំឡើងទៅ នឹងបានតាំងខ្លួននៅក្នុងឋានៈគ្រាន់បើដោយខ្លួនឯងគ្រាក្រោយនឹងមានបុណ្យវាសនាល្អ ។

កើតថ្ងៃអង្គារ ជាមាត់ មាត់នោះ ចរចា រម៉ោករម៉ាំង ចូលចិត្តនិយាយស្រីៗ និងត្លុកកំប្លែង។ ព្រះព្រហស្បតិ ជាចិត្ត ចិត្តនោះមិនដាច់ ចំណេះវិជ្ជាទន់ខ្សោយ ចូលចិត្តព្រះសង្ឃ ។ ព្រះអាទិត្យ ជាអាសន៍ មានកាមរាគខ្លាំង។ព្រះពុធនិង ព្រះសុក្រ ជាដៃ ដៃនោះមានថ្វីល្អ ចូលចិត្តក្នុងការធ្វើជាង ។ ព្រះសៅរ៍ និង ព្រះច័ន្ទ ជាជើង នឹងត្រូវដើរច្រើន ។

ឆ្នាំខាល អ្នកមានកំណើតក្នុងខែ

– ៥ / ៦ / ៧ ៈ ខ្លារខិន ជាធាតុឈើស្ងួត ជាខ្លារក្សាទឹកចិត្តទៀងត្រង់ ច្រើនតែទទួលសេចក្ដីទុក្ខព្រួយ ។
– ៨ / ៩ / ១០ ៈ ខ្លាត្រី ធាតុឈើស្ទន់ នឹងបានកូនមានបុណ្យ នឹងបានពឹងបុណ្យប្រពន្ធ ។
– ១១ / ១២ / ១ ៈ ខ្លាដំបង ធាតុឈើក្រអូប និងបានកូនមានបុណ្យ និងបានពឹងបុណ្យប្រពន្ធ ។
– ២ / ៣ / ៤ ៈ ខ្លាស៊ីមនុស្ស ធាតុឈើលើកំពូលភ្នំ និងមានបញ្ញាឈ្លាសវៃ ។

ឆ្នាំឆ្លូវ អ្នកមានកំណើតក្នុងថ្ងៃ

ថ្ងៃអាទិត្យ ៈ ខ្លានៅក្នុងព្រៃ រកស៊ីដើរផ្លូវឆ្ងាយ ។
ថ្ងៃច័ន្ទ ៈ ខ្លាជាប់អន្ទាក់ នឹងត្រូវលំបាករឿយៗ ។
ថ្ងៃអង្គារ ៈ ខ្លាស៊ីមនុស្ស ទោសៈច្រើន ចិត្តសាហាវ ។
ថ្ងៃពុធ ៈ ខ្លាចាំសីល ចិត្តធម៌ ល្អណាស់ ។
ថ្ងៃព្រហស្បតិ ៈ ខ្លាឥសីជប់ មានបុណ្យ គ្រាក្រោយនឹងបានជាធំ ។
ថ្ងៃសុក្រ ៈ ខ្លាធ្លាក់ក្នុងជ្រោះ អភ័ព្វ នឹងត្រូវរងទុក្ចជានិច្ច ។
ថ្ងៃសៅរ៍ ៈ ខ្លាទេញ្តរក្សា ល្អណាស់ហោង ។

ទំនាយឆ្នាំកំណើត សំរាប់ឆ្នាំថោះ

ឆ្នាំថោះ (ទន្សាយ) ពង្សមនុស្សស្រី ត្រូវកាលព្រះនេមិរាជយាងទៅឋានសួគ៌ និងឋាននរក ។

ឆ្នាំថោះ អ្នកនោះត្រង់ មុខមាត់ដៃជើង ច្រើនតែមានដំបៅជានិច្ច មានខ្ញុំកំដរនិងទ្រព្យសម្បត្តិ គួរសម បើធ្វើស្រែចំការល្អ បានកូនម្នាក់ជាទីពឹងពំនាក់អាស្រ័យ អាយុ ១១_១៣_១៥ឆ្នាំ មានគ្រោះថ្នាក់។

កើតថ្ងៃពុធ ជាមាត់ មាត់នោះអភ័ព្វ ចរចាមិនសូវពិរោះ តែប៉ិនប្រសប់និយាយប្រលោមលួងលោម ។ ព្រះសុក្រ ជាចិត្ត ចិត្តនោះ រម៉ោករម៉ាំង ចូលចិត្តយកអាសារចៅហ្វាយនាយ ខ្លួនឯងអភ័ព្វ តែមាន មនុស្សរាប់អានច្រើន ល្មមចិញ្ចឹមខ្លួនបាន ។ ព្រះច័ន្ទជាអាសន៍ មានកាមរោគស្ដួចស្ដើង មិនចូលចិត្តក្នុងការ ចង់ស្រី ។ ព្រះព្រហស្បតិ និង ព្រះសៅរ៍ជាដៃ ធ្វើការងារមានថ្វីដៃល្អ ។ ព្រះអាទិត្យ និង ព្រះអង្គារជាជើង ជាមនុស្សចូលចិត្តដើរ ។

ឆ្នាំថោះ អ្នកមានកំណើតក្នុងខែ

– ៥ / ៦ / ៧ ៈ ទន្សាយនៅក្នុងវង់ព្រះច័ន្ទធាតុឈើស្ងួតលុះត្រាតែលំបាកចិត្ត ទើបបានជាអ្នកជាបើជាមនុស្សសុចរិត នឹងមានបុណ្យវាសនា ។
– ៨ / ៩ / ១០ ៈ ទន្សាយខ្វាក់ភ្នែកម្ខាងផង បាក់ភ្លៅខាងស្ដាំផង ធាតុឈើស្ទន់ នឹងមានកេរ្តិ៍ឈ្មោះល្បីល្បាញ ។
– ១១ / ១២ / ១ ៈ ទន្សាយស្គាំងស្គមធាតុឈើក្រអូបច្រើនតែលំបាកចិត្ត និង ឈឺដៃជើង គង់បានល្អ ក្នុងកាលជាខាង ក្រោយ ។
– ២ / ៣ / ៤ ៈ ទន្សាយដាំដូង ធាតុឈើភ្នំមានបញ្ញាឈ្លាសវៃ ។

ឆ្នាំថោះ អ្នកមានកំណើតក្នុងថ្ងៃ

ថ្ងៃអាទិត្យ ៈ ទន្សាយរត់ចេញពីភ្លើង ត្រូវលំបាកចិត្ត មិនល្អឡើយ ។
ថ្ងៃច័ន្ទ ៈ ទន្សាយទេវតាចិញ្ចឹម ល្អណាស់ ។
ថ្ងៃអង្គារ ៈ ទន្សាយសាធារណ៍ អភ័ព្វ មិនល្អឡើយ ។
ថ្ងៃពុធ ៈ ទន្សាយបាក់ភ្លៅ រកស៊ីលំបាកណាស់ ។
ថ្ងៃព្រហស្បតិ ៈ ទន្សាយរត់ទៅមុនកូន ជាមនុស្សចិត្តក្ដៅ និងចិត្តរហ័ស ។
ថ្ងៃសុក្រ ៈ ទន្សាយមានបរិវាច្រើន នឹងបានជាធំល្អណាស់ ។
ថ្ងៃសៅរ៍ ៈ ទន្សាយស្ដេចចិញ្ចឹម ឧត្តមល្អនាស់ ។

ទំនាយឆ្នាំកំណើត សំរាប់ឆ្នាំរោង

ឆ្នាំរោង (ពស់ធំ) ពង្សទេវតាប្រុស ត្រូវកាលព្រះមហោសថដោះប្រស្នាអោយទេវតាស្ដាប់ ។

ឆ្នាំរោង បានកូនជាទីពំនាក់អាស្រ័យ កូនទី ២ មានបុណ្យនិងមានញាតិកា មាសប្រាក់ខ្ញុំកំដរច្រើន ។
កាលអាយុបាន ១៥ ដល់ ១៩ ឆ្នាំ ច្រើនតែឃ្លាតចេញពីទីលំនៅទៅទីដទៃ អាយុ ៣០ ឆ្នាំ នឹងបាន លាភច្រើន អាយុបាន ៣៧_៥០ឆ្នាំ មានគ្រោះអាក្រក់ម្ដង ។

កើតថ្ងៃព្រហស្បតិ ជាមាត់ មាត់នោះចរចាស្រស់ស្រាយពីរោះក្បោះក្បាយ ដឹងគោលអ្នកប្រាជ្ញ ។ ព្រះសៅរ៍ជាចិត្ត ចិត្តនោះទោសៈច្រើន តែឆាប់បាត់ ជាមនុស្សចិត្តបុណ្យ ។ ព្រះអង្គារជាអាសន៍ មានកាម រាគខ្លាំង ច្រើនតែមានស្នាមនៅក្នុងកំបាំង ។ ព្រះសុក្រ និងព្រះអាទិត្យ ជាដៃ ថ្វីដៃទន់ខ្សោយ ធ្វើការងារ ច្រើនមិនបានផលប្រយោជន៍ ។

ឆ្នាំរោង អ្នកមានកំណើតក្នុងខែ

– ៥ / ៦ / ៧ ៈ ពស់នាគរាជ ធាតុទង់ហ្វ៊ា ធ្វើរាជការល្អ មានខ្ញុំកំដរច្រើន សត្រូវបៀតបៀនមិនបានឡើយ ។
– ៨ / ៩ / ១០ ៈ ពស់ថ្លាន់ធំ ធាតុមាសរាគី នៅតូច លំបាកចិត្ត ធំឡើងបានល្អ ។
– ១១ / ១២ / ១ ៈ ពស់វែកទ្រូងរនាម ធាតុស្ពាន់ស ច្រើនមើលងាយគេ តែចិត្តបុណ្យ ។
– ២ / ៣ / ៤ ៈ ពស់ថ្លាន់ភ្ញី ធាតុមាសទឹកដប់ ជាអ្នកទៀងត្រង់ ធ្វើរាជការនឹងបានជាធំ ។

ឆ្នាំរោង អ្នកមានកំណើតក្នុងថ្ងៃ

ថ្ងៃអាទិត្យ ៈ ពស់នាគរាជ មានបរិវាច្រើន ល្អណាស់ ។
ថ្ងៃច័ន្ទ ៈ ពស់សាធារណ៍ អភ័ព្វ មិនល្អឡើយ ។
ថ្ងៃអង្គារ ៈ ពស់មានពិស ចិត្តកាចហាវ ។
ថ្ងៃពុធ ៈ ពស់ធ្លាក់ជ្រោះ នឹងត្រូវទទួលទុក្ខព្រួយជានិច្ច ។
ថ្ងៃព្រហស្បតិ ៈ ពស់ត្រូវមន្តអាគមគេ មិនល្អឡើយ។
ថ្ងៃសុក្រ ៈ ពស់គេវាយសំលាប់ អភ័ព្វ មិនល្អឡើយ ។
ថ្ងៃសៅរ៍ ៈ ពស់គេវាយសំលាប់ អភ័ព្វ មិនល្អឡើយ ។

ទំនាយឆ្នាំកំណើត សំរាប់ឆ្នាំម្សាញ់

ឆ្នាំម្សាញ់ (ពស់តូច) ពង្សមនុស្សប្រុស ត្រូវកាលព្រះភូរិទត្តកំពុងចាំសីលលើដំបូក នាយអាលំពាយចាប់យកបាត់ទៅ ។

ឆ្នាំម្សាញ់ ជាអ្នកមិនត្រូវការពឹងអ្នកដទៃ អាយុបាន ៥៦ ឆ្នាំ នឹងមានគ្រោះកាចម្ដង ។

បើកើតថ្ងៃសុក្រ ជាមាត់ មាត់នោះចរចាឡែបខាយ ជាទីគាប់ចិត្តដល់មនុស្សទាំងឡាយ ។ ព្រះអាទិត្យ ជាចិត្ត ចិត្តនោះច្រើនសាប់ឡាប់ មិនស្អាត មិននឹងនួន ។ ព្រះពុធ ជាអាសន៍ មានកាមរាគល្មម គួរសម។ ព្រះសៅរ៍ និង ព្រះច័ន្ទ ជាដៃ ធ្វើការងារច្រើនសំរេចដូចសេចក្ដីប្រាថ្នា។ ព្រះអង្គារនិងព្រះព្រហស្បតិ៍ ជាជើងជាអ្នកចូលចិត្តដើរ ។

ឆ្នាំម្សាញ់ អ្នកមានកំណើតក្នុងខែ

– ៥ / ៦ / ៧ ៈ ស្ដេចពស់តូចៗ ធាតុភ្លើងអគ្គីសនី ច្រើនតែជាមនុស្សមានចិត្តបុណ្យ ។
– ៨ / ៩ / ១០ ៈ ពស់វែកដំបូក ធាតុភ្លើងគប់ ចិត្តរឹង ហើយមានបញ្ញាច្រើន ។
– ១១ / ១២ / ១ ៈ ពស់វែកស្រងែធាតុភ្លើងក្នុងថ្មចិត្តបុណ្យ តែច្រើនមើលងាយគេ ។
– ២ / ៣ / ៤ ៈ ពស់ស្លឹកឈើ ធាតុភ្លើងក្នុងវែក ចិត្តបុណ្យ នឹងបានជាធំ ។

ឆ្នាំម្សាញ់ អ្នកមានកំណើតក្នុងថ្ងៃ

ថ្ងៃអាទិត្យ ៈ ពស់រត់ចេញពីភ្លើង ចុះទៅក្នុងទឹក ច្រើនតែទទួលសេចក្ដីទុក្ខព្រួយ ។
ថ្ងៃច័ន្ទ ៈ ពស់នៅក្នុងរន្ធ មានសេចក្ដីសុខសប្បាយជានិច្ច ។
ថ្ងៃអង្គារ ៈ ពស់រត់ចេញពីភ្លើងព្រៃ អភ័ព្វ តែងតែទទួលសេចក្ដីលំបាកជារឿយៗ ។
ថ្ងៃពុធ ៈ ពស់សាធារណៈ រកស៊ីចិញ្ចឹមជីវិតបានដោយលំបាកមិនល្អឡើយ ។
ថ្ងៃព្រហស្បតិ ៈ ពស់អារក្សនៅក្នុងល្អាងមាស មានបុណ្យ នឹងបានជាធំ ល្អណាស់ ។
ថ្ងៃសុក្រ ៈ ពស់រក្សាទ្រព្យ ចិត្តកំណាញ់ មានទ្រព្យច្រើនល្អណាស់ ។
ថ្ងៃសៅរ៍ ៈ ពស់ស្គារគ្នា ប្រុសច្រើនតែខ្សត់ភរិយា ស្រីច្រើនតែ ចិត្តអ្នកលេង គ្មាន ។

ទំនាយឆ្នាំកំណើត សំរាប់ឆ្នាំមមី

ឆ្នាំមមី (សេះ) ពង្សទេវតាស្រី ត្រូវកាលព្រះច័ន្ទកុមារដែលព្រាហ្មណ៍យកទៅបូជាយញ្ញ បាន ទេវតាមកជួយ ។

ឆ្នាំមមី កាលនៅតូច មាតាបិតាស្រឡាញ់ណាស់ អាយុបាន ២១ ដល់ ២៥ ត្រូវចាកចេញពីទីលំ នៅ អាយុបាន ៣១ ឆ្នាំ មានគ្រោះម្ដង ៦៣ ឆ្នាំម្ដង ។

កើតថ្ងៃសៅរ៍ ជាមាត់ មាត់នោះចរចាផ្ដេសផ្ដាស់ តែគំនិតប្រកាន់ថាត្រូវ ។ ព្រះច័ន្ទ ជាចិត្ត ចិត្ត នោះច្រើនតែវាយឫកខ្ពស់ ចង់តែធ្វើការធំដុំ ។ ព្រហស្បតិ៍ជាអាសន៍ និងជាអ្នកមានចិត្តខ្ជាប់ខ្ជួន ។ ព្រះ អាទិត្យ និងព្រះអង្គារ ជាដៃ ធ្វើការងារមិនសូវល្អ ។ ព្រះពុធនិង ព្រះសុក្រ ជាជើង មិនសូវដើរឆ្ងាយពីទីលំនៅទេ ។

ឆ្នាំមមី អ្នកមានកំណើតក្នុងខែ

– ៥ / ៦ / ៧ ៈ អស្វរាជ (ស្ដេចសេះ) ធាតុភ្លើងអគ្គីសនី មានបញ្ញាច្រើន ចិត្តបុណ្យ ។
– ៨ / ៩ / ១០ ៈ សេះទ័លច្រក ធាតុភ្លើងគុប ច្រើនតែចិត្ត អ្នកលេង ខុសព្រោះតែមាត់ ។
– ១១ / ១២ / ១ ៈ សេះមនុស្សចិញ្ចឹម ធាតុភ្លើងក្នុងថ្ម នឹងមានទ្រព្យសម្បត្តិ តែមិនសូវថ្កុំថ្កើង ។
– ២ / ៣ / ៤ ៈ សេះខ្ចកជើង ធាតុភ្លើងក្នុងកែវ នឹងបានយសស័ក្កិធំដុំ ឬ បានជាសេដ្ឋី ។

ឆ្នាំមមី អ្នកមានកំណើតក្នុងថ្ងៃ

ថ្ងៃអាទិត្យ ៈ សេះសន្ធព មានតេជានុភាពច្រើន ។
ថ្ងៃច័ន្ទ ៈ សេះទេវតាចិញ្ចឹម មានបុណ្យវាសនាល្អ ។
ថ្ងៃអង្គារ ៈ សេះមហាក្សត្រចិញ្ចឹម ឧត្តមល្អ នឹងមានទ្រព្យសម្បតិ្តច្រើន ។
ថ្ងៃពុធ ៈ សេះសាធារណៈ មាយាទមិនល្អ ។
ថ្ងៃព្រហស្បតិ ៈ សេះមន្ត្រីចិញ្ចឹម ឧត្តមល្អ តែនឿយហត់ជានិច្ច ។
ថ្ងៃសុក្រ ៈ សេះស្លាប់មេ អភ័ព្វ គ្មានទីពឹង ។
ថ្ងៃសៅរ៍ ៈ សេះថ្លស់សរសៃ នឹងត្រូវធ្លាក់ខ្លួនជាមនុស្សក្រីក្រ លំបាក មិនល្អឡើយ ។

ទំនាយឆ្នាំកំណើត សំរាប់ឆ្នាំមមែ

ឆ្នាំមមែ (ពពែ) ពង្សទេព្តាស្រី ត្រូវកាលព្រះព្រហ្មរែកមាសចុះ មកឋានមនុស្សលោក ហើយចាំសីល ។

ឆ្នាំមមែ កាលពីនៅតូច អភ័ព្វ ពឹងញាតិកាមិនបានអាយុបាន ១ឆ្នាំ លំបាកចិញ្ចឹម អាយុ ១១-១២ឆ្នាំ មានគ្រោះម្ដង អាយុ ១៥ឆ្នាំត្រូវចាកទីលំនៅរបស់ខ្លួន ទើបមានលាភ អាយុ១៦-៣១ឆ្នាំ មានគ្រោះម្ដងទៀតបើធ្វើរាជការ នឹងបានជាធំ ជាទីគាប់ចិត្តរបស់សមណព្រាហ្មណ៍ នឹងបានកូនពីរនាក់ ជាទីពឹងពំនាក់អាស្រ័យ ។

ឆ្នាំមមែ អ្នកមានកំណើតក្នុងខែ

– ៥ / ៦ / ៧ ៈ ពពែ រកស៊ីដាច់សង្វែង ធាតុទង់ហ៊ា ច្រើនតែចូលចិត្តរៀន ចំណេះវិជ្ជា រកស៊ីចិញ្ចឹមជីវិតខ្លួនឯង ស្វែងរកលាភបានដោយកម្រ ។
– ៨ / ៩ / ១០ ៈ ពពែអ្នកស្រុកចិញ្ចឹម ធាតុមាសរាគីច្រើនតែបានទទួលសេចក្ដីទុក្ខព្រួយ ។
– ១១ / ១២ / ១ ៈ ពពែខ្ចកជើង ធាតុស្ពាន់ស ច្រើនតែឈឺដៃជើង ទឹកចិត្តក្លាហាន មានសតិបញ្ញាល្អណាស់ ។
– ២ / ៣ / ៤ ៈ ពពែឧកញាចិញ្ចឹម ធាតុមាសទឹកដប់ចិត្តទន់ប្រកបដោយបុណ្យ នឹងបានជាធំមានធនធានច្រើន។

ឆ្នាំមមែ អ្នកមានកំណើតក្នុងថ្ងៃ

ថ្ងៃអាទិត្យ ៈ ពពែកណ្ដាលផ្សារ រកបាន ទុកមិនគង់ ។
ថ្ងៃច័ន្ទ ៈ ពពែសេដ្ឋីចិញ្ចឹម មានទ្រព្យច្រើន ល្អណាស់ ។
ថ្ងៃអង្គារ ៈ ពពែមនុស្សខ្វាក់ចិញ្ចឹម រកស៊ីដាច់សង្វែងឆ្ងាយណាស់ ។
ថ្ងៃពុធ ៈ ពពែព្រះរាជគ្រូចិញ្ចឹម មានសតិបញ្ញា ឈ្លាសវាងវៃណាស់ ។
ថ្ងៃព្រហស្បតិ ៈ ពពែពោធិសត្វចិញ្ចឹម នឹងបានជាធំប្រពៃណាស់ ។
ថ្ងៃសុក្រ ៈ ពពែឥតមានម្ចាស់ អភ័ព្វ គ្មានទីពឹង ។
ថ្ងៃសៅរ៍ ៈ ពពែខ្វាក់ភ្នែក ត្រូវរងទុក្ខទោសជានិច្ច ។

ទំនាយឆ្នាំកំណើត សំរាប់ឆ្នាំវក

ឆ្នាំវក (ស្វា) ពង្សយក្សប្រុស ត្រូវកាលព្រះធូរ ដែលអសុរនវយក្ខ ចាប់ចងនឹងកន្ទុយសេះ ហើយ នាំយកទៅនគររាជ ។

ឆ្នាំវក បើជាឈ្មួញ នឹងបានលាភច្រើន មានកូន ៤ នាក់ជាទីពឹងនាក់អាស្រ័យ កូនម្នាក់នឹងបានធ្វើ រាជការ ។

កើតថ្ងៃច័ន្ទ ជាមាត់ មាត់នោះចរចាផ្អែមល្អែម ស្គាល់គោលបំណងអ្នកប្រាជ្ញរៀនសូត្រចំណេះ វិជ្ជាល្អណាស់ ជាទីគាប់ចិត្តរបស់សមណៈ និងនាយចៅហ្វាយ ។ ព្រះពុធជាចិត្តនោះ ស្រឡាញ់តែ ពាក្យពេចន៍ ពិរោះក្បោះក្បាយ ។ ព្រះសៅរ៍ ជាអាសន៍ មានកាមរាគខ្លាំង ចូលចិត្តធ្វើសេចក្ដីសិទ្ធស្នាលជាមួយនឹងស្ត្រី ហើយច្រើនតែមានប្រពន្ធច្រើន បើស្ត្រីវិញ ចូលចិត្តបេះបួយ និយាយ ដើមគេនឹងមានស្លាកស្នាមក្នុងទីកំបាំង ។ ព្រះអង្គារ និងព្រះព្រហស្បតិ៍ជាដៃ ធ្វើការអ្វីមានថ្វីដៃមិនទន់ខ្សោយ ប៉ុន្តែយឺតយូរបន្តិច ។ ព្រះសុក្រ និងព្រះអាទិត្យ ជាដើម មិនសូវដើរពេក ។

ឆ្នាំវក អ្នកមានកំណើតក្នុងខែ

– ៥ / ៦ / ៧ ៈ ស្វាពោធិសត្វ ធាតុដែកទន់ ចិត្តសុភាពទន់ភ្លន់ ធ្វើគុណដល់នរណាមិនបានផលតែបានល្អទៅគ្រា ក្រោយ ។
– ៨ / ៩ / ១០ ៈ ស្វាព្រៃ ធាតុមេដែក ចិត្តស្មោះត្រង់ល្អនឹងបានជាធំ ។
– ១១ / ១២ / ១ ៈ ស្វាព្រៃស្មសាន ធាតុដែកល្អ ចិត្តក្លាហានមានបរិវារច្រើន ។
– ២ / ៣ / ៤ ៈ ស្វាព្រាហ្មណ៍ ចិញ្ចឹមលំបាក ធាតុដែកថែបចិត្តបុណ្យ ចរចាទៀងត្រង់ ។

ឆ្នាំវក អ្នកមានកំណើតក្នុងថ្ងៃ

ថ្ងៃអាទិត្យ ៈ ស្វាមន្ត្រីចិញ្ចឹម នឹងបានជាធំល្អណាស់ ។
ថ្ងៃច័ន្ទ ៈ ស្វាសាធារណៈ អភ័ព្វ មិនល្អឡើយ ។
ថ្ងៃអង្គារ ៈ ស្វាជាប់ទ្រុងដែក នឹងមានសេចក្ដីទុក្ខព្រួយ ។
ថ្ងៃពុធ ៈ ស្វាឥសីចិញ្ចឹម មានការចេះដឹងច្រើន ល្អណាស់ ។
ថ្ងៃព្រហស្បតិ ៈ ស្វារាជគ្រូចិញ្ចឹម មានបញ្ញាឈ្លាសវៃ ។
ថ្ងៃសុក្រ ៈ ស្វាពោធិសត្វ មានបុណ្យវាសនា ល្អណាស់ ។
ថ្ងៃសៅរ៍ ៈ ស្វាជាប់ចំណង ច្រើនតែទទួលទុក្ខព្រួយមិនល្អឡើយ ។

ទំនាយឆ្នាំកំណើត សំរាប់ឆ្នាំរកា

ឆ្នាំរកា (មាន់) ពង្សយក្ខប្រុស ត្រូវកាលព្រះវេស្សន្តរ នាំព្រះអគ្គមហេសី និង ព្រះរាជបុត្រទាំងពីរទៅឯភ្នំគិរីវង្គត ។

ឆ្នាំរកា កាលនៅពីតូច អភ័ព្វមាតាបិតា ញាតិកាទាំងឡាយខាងក្រោយមក នឹងមានបុណ្យវាសនា ធ្វើគុណដល់គេ ច្រើនមានទោស អាយុ ២០ ឆ្នាំ ពឹងបានតែខ្លួនឯង ពឹងអ្នកដទៃមិនបានឡើយ ។

កើតថ្ងៃអង្គារ អង្គារជាមាត់ មាត់នោះចរចាសាហាវ ចូលចិត្តនិយាយតែរឿងស្រីៗ ។ ព្រះព្រហស្បតិ៍ ជាចិត្ត ចិត្តមិនសូវដាច់រៀនសូត្រចំណេះវិជ្ជាអ្វីមួយ ចាំមិនបានយូរ ជាមនុស្សចិត្តបុណ្យ ។ ព្រះអាទិត្យជាអាសន៍ មានកាមរាគខ្លាំង ។ ព្រះពុធ និងព្រះសុក្រជាដៃ មានថ្វីដៃល្អ ចូលចិត្តក្នុងការងារធ្វើជាង។ ព្រះសៅរ៍និងព្រះច័ន្ទជាជើង ជាមនុស្សចូលចិត្តដើរ ។

ឆ្នាំរកា អ្នកមានកំណើតក្នុងខែ

– ៥ / ៦ / ៧ ៈ មាន់អ្នកស្រុកចិញ្ចឹម ធាតុដែកទន់ នៅពីតូចលំបាកចិត្ត ចិត្តទន់ និងចិត្តបុណ្យបើស្រីច្រើនតែខ្សត់ស្វាមី ។
– ៨ / ៩ / ១០ ៈ មាន់ព្រៃ ធាតុមេដែក មានបុណ្យ និងមានបញ្ញា តែមានចិត្តកំណាចឃោរឃៅ ។
– ១១ / ១២ / ១ ៈមាន់ខ្មោច ដើរចរច្រប់អារ៉ប់ ធាតុដែកល្អមិនសូវមានបញ្ញា ច្រើនតែទទួលសេចក្ដីលំបាក តែចិត្តបុណ្យ ។
– ២ / ៣ / ៤ ៈ មាន់ពោធិសត្វ ធាតុដែកថែប មានទ្រព្យនិងមានបញ្ញាចូលចិត្តរៀនចំណេះវិជ្ជាល្អណាស់ហោង។

ឆ្នាំរកា អ្នកមានកំណើតក្នុងថ្ងៃ

ថ្ងៃអាទិត្យ ៈ មាន់មន្ត្រីចិញ្ចឹម បរិបូណ៌ ល្អណាស់ ។
ថ្ងៃច័ន្ទ ៈ មាន់ស្វែងរកអាហារមិនបាន ច្រើនតែអភ័ព្វ ។
ថ្ងៃអង្គារ ៈ មាន់សំរាប់ភ្នាល់នៅទីក្រុង ច្រើនតែជាចិត្តអ្នកលេង ។
ថ្ងៃពុធ ៈ មាន់រាជគ្រូចិញ្ចឹម មានបញ្ញាឈ្លាសវៃ ល្អណាស់ ។
ថ្ងៃព្រហស្បតិ ៈ មាន់ពោធិសត្វចិញ្ចឹម ចិត្តបុណ្យ នឹងមានវាសនាល្អ ។
ថ្ងៃសុក្រ ៈ មាន់លាមក រកស៊ីលំបាកណាស់ ។
ថ្ងៃសៅរ៍ ៈ មាន់ព្រាហ្មណ៍ចិញ្ចឹម ឧត្តមល្អណាស់ហោង ។

ទំនាយឆ្នាំកំណើត សំរាប់ឆ្នាំច

ឆ្នាំច (សុនខ) ពង្សយក្ខិនី ត្រូវកាលព្រះបាទបារិសាទ មានដុះចង្កូម ត្រូវគេបណ្ដេញចេញពីនគរ។

ឆ្នាំច ត្រង់មុខច្រើនកើតដំបៅ និងរោគមុន មានខ្ញុំកំដរ និងទ្រព្យសម្បត្តិគួរសម បើធ្វើស្រែចំការ បានផលល្អ នឹងមានលាភមានកូនម្នាក់ជាទីពំនាក់អាស្រ័យ អាយុ ១១-១៣-២៥ឆ្នាំ មានគ្រោះម្ដង ។

បើកើតថ្ងៃពុធ ពុធជាមាត់ មាត់នោះអភ័ព្វ និយាយលួងលោម មិនសូវប្រសប់ តែល្មមចិញ្ចឹមខ្លួនបាន ។ ព្រះសុក្រ ជាចិត្ត ចិត្តនោះក្លាហាន ចូលចិត្តយកអាសាចៅហ្វាយនាយ ជាទីស្រឡាញ់ រាប់អាននៃជនទាំងឡាយ តែខ្លួនឯងអភ័ព្វ ។ ព្រះច័ន្ទជាអាសន៍មានកាមរាគតិច មិនគាប់ចិត្តនឹងតណ្ហា ។ ព្រះព្រហស្បតិ៍និងព្រះសៅរ៍ជាដៃ ថ្វីដៃល្អ ស្ទាត់ជំនាញក្នុងការធ្វើជាង ។ ព្រះអាទិត្យ និង ព្រះអង្គារជាជើង មិនសូវដើរចាក់ទីលំនៅ ។

ឆ្នាំច អ្នកមានកំណើតក្នុងខែ

– ៥ / ៦ / ៧ ៈ សុនខមនុស្សចិញ្ចឹម ធាតុដីឆ្អិន នៅតូចលំបាកចិត្ត គ្រាក្រោយបានល្អឡើងវិញ ។
– ៨ / ៩ / ១០ ៈ សុនខដេញសត្វ មានម្ចាស់ចិញ្ចឹម ធាតុដីស្ងោរ ចរចាទៀងត្រង់ មានបុណ្យ និងបញ្ញាច្រើន ។
– ១១ / ១២ / ១ ៈ ឆ្កែចចក ធាតុដីដំបូក ចិត្តក្លាហាន ហើយជាអ្នកកសាងជាតិ ។
– ២ / ៣ / ៤ ៈ សុនខកណ្ដាលផ្សារ ធាតុដីលាប ជង្រុកចិត្តទាហាន ល្មមចិញ្ចឹមខ្លួនបាន ។

ឆ្នាំច អ្នកមានកំណើតក្នុងថ្ងៃ

ថ្ងៃអាទិត្យ ៈ សុនខដេញសត្វ ត្រូវធ្វើការនឿយហត់ច្រើន ។
ថ្ងៃច័ន្ទ ៈ សុនខឥសីចិញ្ចឹម មានវិជ្ជាច្រើន ។
ថ្ងៃអង្គារ ៈ សុនខអង្គែស៊ី អភ័ព្វ រកស៊ីលំបាក ។
ថ្ងៃពុធ ៈ សុនខបរិវារច្រើន ឧត្តមប្រពៃណាស់ ។
ថ្ងៃព្រហស្បតិ ៈ សុនខឆ្កួត ចរចាច្រើនក្រេវក្រោធ ចិត្តកាចសាហាវឃោឃៅ ។
ថ្ងៃសុក្រ ៈ សុនខឧកញ៉ាចិញ្ចឹម ប្រសើរឧត្តម មានទ្រព្យសម្បត្តិស្ដុកស្ដម្ភ ។
ថ្ងៃសៅរ៍ ៈ សុនខជាប់ចំណង បើប្រុសច្រើនតែចិត្តអ្នកលេង ។

ទំនាយឆ្នាំកំណើត សំរាប់ឆ្នាំកុរ

ឆ្នាំកុរ (ជ្រូក) ពង្សមនុស្សស្រី ត្រូវត្រង់កាលព្រះសុភមិត្រនាំនាងកែវគ្រឹះស្នាទៅព្រៃ ។

ឆ្នាំកុរ កាលអាយុបាន ១៩ឆ្នាំ ត្រូវឃ្លាតចាកទីលំនៅ នឹងមានបុត្រពីរនាក់ បុត្រទីពីរ មានបុណ្យ មានពួកក្រុមមិត្រភ័ត្តិច្រើន ព្រមទាំងមានទ្រព្យសម្បត្តិមាសប្រាក់ បរិបូរណ៌ដោយទាសាទាសីជាច្រើន។

កើតថ្ងៃព្រហស្បតិ៍ ព្រហស្បតិ៍ជាមាត់ មាត់នោះចរចាត្រឹមត្រូវ ស្គាល់គោលអ្នកប្រាជ្ញ ប៉ុន្តែគេ មិនសូវស្គាល់ ។ ព្រះសៅរ៍ជាចិត្ត ចិត្តនោះ ក្ដៅក្រហាយទោសោច្រើន តែឆាប់បាត់ មិនចេះចងគំនុំគុំគួន អាឃាដព្យាបាទគេ ចិត្តប្រកបដោយបុណ្យ ។ ព្រះអង្គារជាអាសន៍ ច្រើនមានស្លាកស្នាមទីកំបាំង ។ ព្រះសុក្រ និងព្រះអាទិត្យ ជាដៃ ត្រូវធ្វើការនឿយហត់ណាស់ ។ ព្រះច័ន្ទ និងព្រះពុធ ជាជើង ជាអ្នកចូលចិត្តដើរច្រើន។

ឆ្នាំកុរ អ្នកមានកំណើតក្នុងខែ

– ៥ / ៦ / ៧ ៈ ជ្រូកមន្ត្រីចិញ្ចឹម ធាតុទឹកទន្លេ មានបុណ្យ និងបញ្ញាច្រើន ។
– ៨ / ៩ / ១០ ៈ ជ្រូកគេចិញ្ចឹមក្នុងទ្រុង ធាតុទឹក មនុស្សអាស្រ័យ មានបុណ្យ និងមានសេចក្ដីទៀងត្រង់ ។
– ១១ / ១២ / ១ ៈ ជ្រូកអង្គែស៊ី ធាតុទឹកក្នុងព្រៃ ចិត្តបុណ្យ ចរចាពាក្យពេចន៍ខ្ជាប់ខ្ជួន ។
– ២ / ៣ / ៤ ៈ ជ្រូកព្រៃពាំកែវ ធាតុទឹកស្ទឹង ចិត្តបុណ្យ ល្អណាស់ហោង ។

ឆ្នាំកុរ អ្នកមានកំណើតក្នុងថ្ងៃ

ថ្ងៃអាទិត្យ ៈ ជ្រូកមន្ត្រីចិញ្ចឹម មានបុណ្យវាសនា ល្អណាស់ ។
ថ្ងៃច័ន្ទ ៈ ជ្រូកគេសំលាប់យកសាច់ស៊ី នឹងត្រូវទទួលសេចក្ដីទុក្ខព្រួយជានិច្ច ។
ថ្ងៃអង្គារ ៈ ជ្រូកសេដ្ឋីចិញ្ចឹម ឧត្តមប្រសើរ នឹងមានទ្រព្យសម្បត្តិច្រើន ។
ថ្ងៃពុធ ៈ ជ្រូកសាធារណៈ អភ័ព្វ មិនល្អឡើយ ។
ថ្ងៃព្រហស្បតិ ៈ ជ្រូកនៅលើភ្នំ ចូលចិត្តដើរលេងចច្រប់អារ៉ប់ ។
ថ្ងៃសុក្រ ៈ ជ្រូកស្អុយក្បាលផងបាក់ភ្លៅផងត្រូវទទួលសេចក្តីទុក្ខព្រួយជានិច្ច ។
ថ្ងៃសៅរ៍ ៈ ជ្រូកមានបរិវារច្រើន នឹងបានជាធំ ល្អណាស់ហោង ។

ប្រភពឯកសារៈ សៀវភៅអក្សរសាស្រ្តបុរាណខ្មែរ

Facebook Comments